Moi boa tarde a toda a xente
ai, Vozes do Nosso Mundo.
Deixádeme, ai, un momento.
Preséntome nun segundo.
Preséntome nun segundo.
Falo desde Compostela.
Entre turistas e tigres,
fala aquí Sara Marchena.
Improvisando. Así se presentou Sara Marchena en resposta ao saúdo inicial de Edilson Sanches Tavares. Foi un abrir de xanela para falar de como recibiu a formación teórica e como comezou a regueifar a través dos obradoiros organizados en Vigo polo Instituto de Ensino Secundario San Tomé do Freixeiro.
Despois chegou a explicación etimolóxica da palabra, desde a orixe no árabe aos diferentes significados cos que se coñece na actualidade; unha panorámica da arte da improvisación noutras culturas do mundo; e as características esenciais do repentismo galego.