Author: Produtores

Os Imperfectos encadearon unha serie de concertos por terras portuguesas. Nada máis retornaren á Galiza, recibiron a chamada de Gabriel André para esta entrevista do Grandes Vozes.

No programa 151 do Grandes Vozes falamos co ensaísta Fernando Fernández Rego, autor de libros como 50 anos de pop, rock e malditismo na música galega, Galicia en clips ou Andrés do Barro. Saudade. O tamén administrador da páxina especializada La Fonoteca.net falounos de Andrés do Barro e contextualizouno con numerosas referencias que aparecen no seu ensaio titulado Unha historia da música en Galicia. 1952-2018, un intenso percorrido pola música galega dos anos 50 á actualidade tomando como partida “esas orquestras e conxuntos que pouco a pouco comezan a virar cara ao pop”

Tal como aparece nunha entrevista publicada por Diario de Ferrol, “a idea do libro é centrarse fundamentalmente no pop, rock, punk e derivados, ademais de atender á canción de autor, desenvolvementos como o de Voces Ceibes ou o do Movemento Popular da Canción Galega, e tamén o jazz-rock e o folk cando este se asocia co rock dalgunha maneira ou coa electrónica xa na actualidade. O underground está moi presente. É estudado e explorado de maneira minuciosa e paixonal, tanto o dos anos 80 como o dos 90 e o da actualidade. Porque a contracultura e os movementos subterráneos foron en Galicia focos principais e vitais da súa historia musical, o xerme de grandes bandas e artistas”.

Pop feito en Compostela coa marca de Esposa, a banda formada por Xacobe, Mar, Cibrán e María. Coñecémolos a través das palabras de Mar Catarina.

Comezamos coa importancia relativa dunha preposición. Matías Nicieza presentou Xonix Records como unha “editora de bandeira” e Lolo Arincón corrixiuno modificando a preposición: “unha editora da Bandeira”, en referencia á localidade da comarca do Deza (entre Santiago de Compostela e Ourense). Ambos tiñan razón, porque este selo discográfico e editora literaria é hoxe unha referencia con prestixio gañado despois de teren feito moitos traballos con excelentes resultados.
Lolo Arincón falounos de gravacións, máis tamén de traballos de pre-produción (arranxos e composición); de produción musical, cinematográfica e de vídeo; da produción de eventos; e mesmo da distribución musical en loxas físicas e dixitais. Obviamente, non esquecemos facerlle cuestións de máxima actualidade e así soubemos que teñen no forno importantes novidades como os primeiros cedés de Cris Cimadevila e dos The Old Galician Coffee Liquor Drinkers ou como os novos de Pauliña e dos D’esmorga.